تاند (شنبه، د حوت ۲۶مه) د ملګرو ملتونو سازمان، امنیت شورا پرون ناوخته د یوې غونډې پر مهال په افغانستان کې د دغه سازمان مرستندوی دفتر( یوناما) د فعالیتونو د تمدید پرېکړه وکړه.
د امنیت شورا د غونډې پر مهال، د بېلابېلو غړو هېوادونو استازو د افغانستان د وضعیت په اړه هم خبرې او بحثونه وکړل.
په ټوله کې، پرېکړه دا شوه چې د ۲۰۲۵ کال د مارچ تر ۱۷ مې به د یوناما ادارې فعالیتونه تمدید شي.
د امنیت شورا د دغې غونډې دوره یي مشري، په ملګرو ملتونو کې د جاپان استازي آمب یامازاکي کوله.
نوموړي د خپلې وینا پر مهال، په افغانستان کې د بشري حقونو او په ځانګړي ډول د ښځو ناوړه وضعیت ته په اشارې وویل، چې د یوناما د ماموریت ډېر تمرکز دې د دې ستونزو تر څنګ د افغانستان بشري ناورین ته زیات وي.
یوناما، چې تر دې مخکې یې په افغانستان کې د طالبانو واکمن رژیم له کړنو خوښ و؛ اوس یې د طالب رژیم د کړنو په اړه له څو انتقادي راپورونو وروسته پر وړاندې د طالبانو دریځ بدل شوی.
د طالبانو د رژیم ویاند ذبیح الله مجاهد تور پورې کړی، چې ګواکې یوناما د امریکا د تګلارو له مخې د دوی خلاف تبلیغاتي راپورونه خپروي.
مجاهد په عین حال کې، د دغې ادارې د ماموریت د تمدید یا نه تمدید په تړاو د خپل رژیم دریځ نه دی په ډاګه کړی.
مخکې د طالبانو چارواکو د افغانستان لپاره د ملګرو ملتونو د یوه بل ځانګړي استازي د ټاکلو مخالفت په دې دلیل کاوه، چې د دوی په باور د یوناما ادارې په موجودیت کې ورته اړتیا نه ویني.
څرګنده نه ده، چې طالبان پر یوناما له نیوکو او مخالفتونو سره له کومې لارې نړیوالو سره د اړیکو چینلونه مخته وړل غواړي؟