تاند (چهار شنبه، د حوت ۲۳ مه) د مارچ په ۱۷ مه، په افغانستان کې د ملګرو ملتونو د سرمنشي ځانګړی مرستندوی دفتر( یوناما) په داسې حال کې خپل کلنی ماموریت پای ته رسوي؛ چې د دغه ماموریت په اړه یې بېلابېل غبرګونونه ښودل شوي.
تمه ده، چې د ملګرو ملتونو امنیت شورا را روانه پنجشنبه یانې دوه ورځې وروسته، په افغانستان کې د یوناما د ماموریت د غځولو په تړاو غونډه وکړي.
یوناما، چې تر دې مخکې یې په افغانستان کې د طالبانو واکمن رژیم له کړنو خوښ و؛ اوس یې د طالب رژیم د کړنو په اړه له څو انتقادي راپورونو وروسته پر وړاندې د طالبانو دریځ بدل شوی.
د طالبانو د رژیم ویاند ذبیح الله مجاهد تور پورې کړی، چې ګواکې یوناما د امریکا د تګلارو له مخې د دوی خلاف تبلیغاتي راپورونه خپروي.
مجاهد په عین حال کې، د دغې ادارې د ماموریت د تمدید یا نه تمدید په تړاو د خپل رژیم دریځ نه دی په ډاګه کړی.
په ملګرو ملتونو کې د افغانستان د دایمي استازولۍ سرپرست نصیر احمد فایق د افغانستان په تړاو د ملي او نړۍوالې اجماع د رامنځته کولو لپاره په سیاسي برخه د یوناما پر کړنو نیوکه کوي؛ خو زياتوي چې، په افغانستان کې د دغه سازمان حضور د بشري حقونو د نقض په تړاو د راپور ورکولو، له افغانانو سره د مرستې او له بېلابېلو بنسټونو او هېوادونو سره افغانستان ته د بشري مرستو د راټولولو د همغږۍ په برخه کې مهم دى.
په جینیوا کې د افغانستان سفیر نصیر احمد اندیشه بیا وایي، چې یوناما په ستونزمنو شرایطو کې د طالبانو د رژیم او نړیوالو تر منځ د پول رول لوبولی.
یوناما د طالبانو د رژیم وروستیو نیوکو ته غبرګون نه دی ښودلی.
مخکې د طالبانو چارواکو د افغانستان لپاره د ملګرو ملتونو د یوه بل ځانګړي استازي د ټاکلو مخالفت په دې دلیل کاوه، چې د دوی په باور د یوناما ادارې په موجودیت کې ورته اړتیا نه ویني.
څرګنده نه ده، چې طالبان پر یوناما له نیوکو او مخالفتونو سره له کومې لارې نړیوالو سره د اړیکو چینلونه مخته وړل غواړي؟