تاند ( پنج شنبه د لیندۍ ـ قوس ۱۳مه) د طالبانو د حکومت ویاند ذبیح الله مجاهد یو ځل بیا ټینګار کړی چې د افغانستان او پاکستان ترمنځ به سوداګریزې لارې هغه مهال بېرته پرانیستل شي، چې اسلام آباد د راتلونکې لپاره قوي ډاډ ورکړي.

د طالبانو په اعلامیه کې راغلي، چې افغانستان د خپلو اړتیاوو مواد له نورو هېوادونو هم پوره کوي، خو د ولسونو د هوساینې او اقتصادي ثبات لپاره یې پرېکړه کړې، چې له قوي اطمنان پرته پاکستان سره لارې نه پرانیزي.

اعلامیه کې راغلي، چې د دواړو هېوادونو د سوداګرۍ او ترانزیټ لارې د پاکستان له لوري په ناقانونه ډول د سیاسي او اقتصادي فشار د وسیلې په توګه تړل شوې وې، چې د دواړو غاړو خلکو ته یې جدي زیانونه واړول.

تازه پاکستاني رسنیو خبر ورکړی، چې د غه هېواد د ملګرو ملتونو په غوښتنه او افغانستان ته د یاد سازمان د بشري مرستو د انتقال لپاره یې تورخم او سپین بولدک لارې په یو طرفه توګه پرانیستې دي.

پر ډیورنډ کرښه ټولې لارې شاوخوا دوه میاشتې کېږي، چې د طالبانو او پاکستان د ترینګلتیاوو له امله تړل شوي دي.

د لارې تړل کېدو سره سم پاکستان کې د سوداګرو ترڅنګ خلک هم له زیان او د توکو لوړو بیو سره مخ دي.