تاند (یکشنبه، د حوت ۲۰ مه) د هند د صنعت او سوداګرۍ وزیر پیوش ګویال او د څلورو اروپايي هیوادونو یوې سوداګري ټولنې نن (یکشنبه) د پانګونې او سوداګرۍ یوه موافقه لاسلیک کړه.
د رویټرز خبري اژانس د راپور له مخې، ګویال په یوه خبري غونډه کې وویل، دا موافقه د هند او د سویس، ناروې، آیسلنډ او لیختنشتاین د سوداګري ډلې ترمنځ شوې چې پر اساس به یې دا ډله (د اروپا د ازاد تجارت ټولنه) په ۱۵ کلونو کې په هند کې د ۱۰۰ میلیارد ډالرو پانګونه کوي.
د هند د سوداګرۍ وزیر ټینګار وکړ چې دا یوه عادلانه موافقه ده چې د دواړو خواوو ګټه پکې مساوي ده.
د هند د سوداګرۍ او صنعت وزیر په وینا، دا موافقه د دوو خواوو ترمنځ له ۲۱ پړاوه خبرو وروسته ترلاسه شوې ده.
د هند صدراعظم غواړي چې تر ۲۰۳۰ پورې د خپل هیواد صادرات په کال کې یو تریلیون ډالرو ته ورسوي.