تاند ( شنبه، د حوت ۱۹ مه) د افغانستان کرېکټ بورډ په نژدې راتلونکې کې د افغانستان غوره لیګ د دویم پړاو سیالیو د ترسره کېدو او په دې اړه د یوې تدابیري غونډې د ترسره کېدو خبر ورکړی.
کرکټ بورد په یوه خبرپاڼه کې ویلي چې یاده غونډه د بورډ د رییس، میروېس اشرف په مشرۍ او د غړو په ګډون ترسره شوه.
په خبرپاڼه کې راغلي چې په دغه ناسته کې د افغانستان غوره لیګ د دویم پړاو ترسراوي د ارزونې په موخه د ټاکل شوي پلاوي راپور ارزول شوی دی.
خبرپاڼه زیاتوي، په ناسته کې د افغانستان شل اوریزه غوره لیګ لپاره د پانګوونکو شرکتونو د غوراوي بهیر په اړه هم خبرې شوي چې له دوه غوره شویو شرکتونو به یواځې یو شرکت د دغه لیګ د پانګوونکي شرکت په توګه غوره شي.
خبرپاڼې کاږلي چې په ناسته کې د کرېکټ بورډ اجراییوي رییس نصیب خان، په متحده عربي اماراتو کې د افغان سوداګرو ټولنې مشر، حاجي عبیدالله صدرخېل، د کاردان پوهنتون رییس احمد خالد حاتم، د کام ایر ګروپ مشر زمري کامګار، الله داد نوري، خان جان الکوزي، رییس احمدزي او د یاد لیګ ارزونې لپاره د ټاکل شوي پلاوي غړو ګډون کړی و.
سرچینې د غونډې او ترسره کېدونکي لیګ په تړاو نور جزییات نه دي ورکړي.