تاند ( شنبه، د حوت ۱۹ مه) د پیسو نړیوال صندوق( ای ایم ایف) د پاکستان د پخواني صدراعظم عمران خان هغه لیک ته ځواب لېږلی، چې له دغه صندوق څخه یې د پاکستان نوي حکومت ته د پور نه ورکولو غوښتنه کړې ده.
د عمران خان په مشرۍ د تحریک انصاف ګوند، چې د پاکستان سترې محکمې څه موده مخکې لغوه اعلان کړی و، د پیسو نړیوال صندوق ته په یوه استولي لیک کې لیکلي، چې د دغه هېواد نوي جوړ شوي حکومت ته تر هغې چې د وروستیو ناندریزو ټاکنو د مشروعیت په اړه ډاډ نه وي ترلاسه شوی، د پورونو له ورکړې ډډه وکړي.
د پیسو نړیوال صندوق ویاند بیا د دغې غوښتنې په ځواب کې ویلي، چې د هېوادونو په کور دننه سیاسي ستونزې دوی پورې اړه نه لري.
هغه دا هم نه دي ویلي، چې دغه صندوق به پاکستان ته نور اضافي پورونه ورکړي کنه؟
د پاکستان نوي صدراعظم شهباز شریف د دندې له پيل سره سم، اقتصادي غونډه بللې او چارواکو ته یې امر کړی چې د پیسو له نړیوال صندوق څخه د نورو پورونو د اخیستو پر لارو چارو غور وکړي.
هغه د دغه هېواد د لړزانده او لا خرابیدونکي اقتصاد بیا رغونه له خپلو مهمو لومړیتوبونو ګڼلی.
دا په داسې حال کې ده، چې پاکستان کې ورځ تربلې اقتصادي کړکېچ په پراخېدو دی او د دغه هېواد پولي واحد( کلداره) د ډالرو پر وړاندې په شدت سره خپل ارزښت نور هم بایلي.
پاکستان وار د مخه هم د پیسو له نړیوال صندوق څخه میلیاردونه ډالره پور وړی دی او په وروستیو کلونو کې دغه صندوق د سختو شرایطو له وضع کولو سره حاضر شوی چې دغه پور وړي ته نور پورونه ورکړي.
پاکستان د کړکېچن اقتصادي وضعیت له امله خپل دولتي هوایي شرکت هم پلور ته وړاندې کړی او ورځ تربلې له دغه هېواده د اقتصادي ناورین له امله مسلکي کادرونه نورو هېوادونو ته د تېښتې لارې چارې لټوي.