تاند (پنجشنبه، د حوت ۱۷ مه) د طالبانو ددفاع وزارت سرپرست، مولوي محمد یعقوب مجاهد د قطر له امیر، شیخ تمیم بن حمد آل ثاني سره کتلي دي.
د طالبانو د رژیم ویاند، ذبیح الله مجاهد پر خپلې اېکس یانې پخواني ټویټر لیکلي، په دغه کتنه کې د دواړو هېوادونو تر منځ د اړیکو پراختیا او بېلابېلو پرمختګونو په اړه خبرې شوې دي.
سرچینې په دې تړاو نور جزییات نه دي ورکړي.
ملا یعقوب سره په دې لیدنه او د قطر په سفر کې، د هغه تر مشرۍ لاندې د دفاع وزارت لوی درستیز قاري فصیح الدین فطرت هم ملګری دی.
تر دې مخکې هم ملا یعقوب قطر ته سفر کړی او چارواکو سره یې لیدنې کتنې لرلې دي.
د هغه د اوسني سفر یو مهم هدف، د دفاعي صنایعو په نړیوال نندارتون کې ګډون ښودل شوی و.
ملا یعقوب د مخکیني سفر پر مهال له قطري چارواکو غوښتي وو، چې د دوی د ځواکونو د معاشونو او ملاتړ لپاره مرسته ورسره وکړي.
قطر په دې اړه څه نه وو ویلي.
د طالبانو د لوی درستیز قاري فطرت د معلوماتو له مخې، دوی اوس تر ۱۷۲ زرو کسانو پورې پوځیان لري او معاشونه ورته له خپلو داخلي عوایدو ورکوي.