تاند (جمعه، د حوت ۱۱مه) د نورستان د نورګرام ولسوالي د تیتن درې کلي اوسیدونکي وايي چې په سیمه کې یې غر ښویېدلی او له کبله یې شاوخوا ۳۰ تنه مړه یا ټپیان شوي دي.
د سیمې یوه اوسیدونکي نن تاند ته وویل چې په دې پېښه کې یو شمېر کورونه یو مخ تر تیږو اوخاورو لاندې شوي او یو شمېر نور زیانمن شوي دي.
د سیمې اوسیدونکي وايي چې له پېښې وروسته خلک خپلو کورونو ته ستنېدای نه شي ځکه چې وېره ده چې غر نور وښوییږي او ټیږې پرې راپرېوځي.
د وروستیو څو ورځو له سختو ورښتونو سره د افغانستان په نورو ولایتونو کې لږترلږه ۱۵ تنه د کورونو د نړېدو اونورو پېښو له امله مړه شوي دي.
په همدې حال کې د هواپېژندنې ادارې اټکل کړی چې سبا او بل سبا به هم په یو شمېر ولایتونوکې واورې او بارانونه واوري.
د درنو واورو له کبله د سالنګ لاره تر بلې خبرتیا پورې بنده شوې ده.
دا ورښتونه د یوه وچ او بې ورښتونو ژمي په وروستیو کې شوي او له همدې کبله ډېره هیله ورته نه شته چې اوبه به به زیاتې کړي.