تاند (سې شنبې د حوت ۸ مه) کاناډایي رسنیو ویلي، چې دغه هېواد د طالبانو رژیم ته د افغانستان د سفارت د سپارلو غوښتنه رد کړې ده.
د کاناډا د بهرنیو چارو وزارت د ویاند جیسون گونگ له قوله ویل شوي، چې په دې اړه د طالبانو د بهرنیو چارو وزارت یو لیک ور لېږلی او دوی ته یې د افغان سفارت د سپارلو غوښتنه کړې ده.
سرچینې ویلي، چې دوی د طالبانو لیک ته ځواب نه دی ورکړی؛ ځکه کاناډا دغه رژیم په رسمیت نه پېژني.
تر دې مخکې له طالبانو سره د کاناډا د دیپلوماتیکو اړیکو د پيل وړاندوېنې شوې وې.
په کابل کې د کاناډا یوه پخواني سفیر عارف لالاني غوښتنه کړې وه، چې له افغانستان سره د بشري مرستو لپاره دې کاناډا په کابل کې خپل دیپلوماتیک حضور پيل کړي.
په بهرنیو هېوادونو کې شاوخوا شل افغان سفارتونه دمګړۍ د طالبانو رژيم سره تعامل لري او ځینو بهرنیو هېوادونو افغان دیپلوماتیک مرکزونه د طالبانو رژیم ته سپارلي او د دوی دیپلوماتان یې منلي دي.
له دې سره، د نړۍ هیڅ کوم هېواد تر اوسه د طالبانو رژیم په رسمیت نه دی پېژندلی.
طالبانو، دوی ته د کاناډا لخوا د افغان سفارت د نه سپارل کېدو خبر ته غبرګون نه دی ښودلی، خو مخکې یې له ټولو هېوادونو غوښتي چې افغان سفارتونه او کونسلګرۍ دوی ته وسپاري او د دوی دیپلوماتان ومني.