تاند- ناسا یا د امریکا د فضايي تحقیقاتو ادارې د مځکې د څارلو لپاره یوه نوې ډېره قیمتي سپوږمکۍ د مځکې مدار ته واستوله.
دا سپوږمکي پېس (Pace) نومېږي.
د دې سپوږمکۍ له استولو سره، چې نژدې یو میلیارد ډالره پرې لګښت شوی، د امریکا پخواني ولسمشر دونالډ ټرمپ مخالفت کاوه.
د سپېس ویبپاڼې د راپور له مخې، دا سپوږمکۍ په فلوریدا ایالت کې د کیپ کاناورال له فضايي مرکزه د سپېس ایکس د فالکن ۹ توغندي په وسیله واستول شوه.
پېس به په مدار کې له فعالیدو وروسته د مځکې د مدار د اتومسفیر او هوا په اړه څېړنه کوي او همداراز به په لومړي وار د څلورو سمندرونو د وضعیت په اړه څېړونکو ته معلومات برابروي.
دا سپوږمکۍ به په بې ساري ډول د سمندرونو بیالوژي انسانانو ته وښيي.