تاند(دوشنبه، د دلوې ۹) د افغانستان په ۲۱ ولایتونو کې نن د طالبانو د روغتیا وزارت او نړیوالو همکارانو له لوري یې ۷ نیم میلیون ماشومانو ته د پولیو پر ضد د واکسینو کمپاین پيل شو.
طالب چارواکو ویلي، چې سږ کال له افغانستانه د دغه مرض د ختمولو هڅې چټکې شوي او څو نور کمپاینونه به هم ترسره شي.
د پيل شوي کمپیاین موده د راتلونکې اوونۍ تر پنجشنبې ورځې ښودل شوې ده.
له څه مودې راهیسې د افغانستان له نیږدې ټولو سیمو د پولیو مرض د ختمیدو خبرونه ورکړل شوي، خو ننګرهار یوازېنی ولایت دی چې تېرکال پکې د پولیو د ۶ مثبتو پېښو د ثبت خبر ورکړل شوی.
افغان دیني عالمان او طالب چارواکي له کورنیو غواړي چې خپل ماشومان واکسین او په دې ډول یې له دغې خطرناکې ناروغۍ وژغوري.