تاند (د دلوې ۷ مه) د افغانستان په ختیځ کې په څو مرګونو ترافیکي پېښو کې لږترلږه ۳۳ تنه مړه شوي دي.
د کابل د امنیه قوماندانۍ ویندوی خالد ځدراڼ پر خپله ایکسپاڼه کښلي، نن (یکشنبې) د کابل ولایت په سروبي ولسوالۍ کې ۱۰ ترافیکي پېښې وشوې چې له کبله یې د ماشومانو او ښځو په شمول ۱۷ تنه مړه شوي او ۱۰ نور ژوبل دي.
ځدراڼ همداراز وویل، دا پېښې د موټر چلوونکو د بې احتیاطۍ او د ترافیکي قوانینو د نه رعایتولو له امله شوي دي.
له بلې خوا په لغمان ولایت کې د کابل – جلال اباد په لویه لاره کې لس ترافیکي پېښې شوي دي.
اسوشیتید پریس خبري اژانس په لغمان کې د طالبانو د امنیه قوماندانۍ په قول نن راپور ورکړ چې په دغو پېښو کې ۱۵ تنه مړه شوي دي.
یو تن بل د لغمان په یوه بله سیمه کې په ترافیکي پېښه کې مړ شوی دی.
د لغمان او سروبي له پېښو جلا د طالبانو د سترې محکمې د عامه امنیت د دېوان ريیس شیخ جلال الدین حقاني پرون ماسپښین په یوه ترافیکي پېښه کې مړ شو.
سترې محکمې پر خپله ایکسپاڼه لیکلي چې دا پېښه په غزني ولایت کې شوې ده.
د پېښې د جزییاتو په اړه څه نه دي ویل شوي.