تاند (دوشنبه، د جدې ۲۵ مه) په لوګر کې د عینک په نوم یوه نوې راډیو پرانیستل شوه.
د طالبانو د رژیم چارواکو ویلي، چې د دغې راډیو ترڅنګ په لوګر کې ۶ نور دولتي او خصوصي راډیوګانې هم فعالیت کوي.
په دې موخه جوړو شویو مراسمو کې د طالبانو د رژیم ویاند ذبیح الله مجاهد وویل، د دوی رژیم د رسنیو پوره ملاتړی او همکار دی .
مجاهد له رسنیو غوښتنه وکړه، چې د شریعت په چوکاټ کې او دغه راز د دوی له پالیسۍ سره سم خپل رسنیز کارونه په ډاډه ډول مخته یوسي.
د طالبانو رژیم په پراخه کچه د بیان ازادۍ په نقض تورن دی او ویل کیږي، چې سلګونه خبریالان د دوی له لاسه هېواد پرېښودو ته اړ شوي.
طالب چارواکي او ویاندویان بیا په دې اړه د رسنیو او خبریالانو د مدافع بنسټونو راپورونه بې اساسه بولي.