تاند (پنجشنبه، د جدې ۲۱ مه) طالبانو د ښځو او نجونو د نیونو په اړه د ملګروملتو د مرستندوی ماموریت، یوناما اندېښنه بې ځایه وبلله.
د طالبانو د حکومت ویندوی ذبیح الله مجاهد په خپله ایکسپاڼه کې لیکلي: افغان مېرمنې حجاب مراعتوي، زور زیاتي ته اړتیا نه شته او د امربالمعروف له لوري هم له چا سره زور زیاتی نه دی شوی.
ده د ملګروملتو د مرستندوی ماموریت اندېښنې ته په اشارې ویلي، په دې اړه شوي پروپاګند حقیقت نه درلود.
دا په داسې حال کې ده چې مخکې ذبیح الله مجاهد د بدحجابۍ په تور د یو شمېر ښځو او نجونو نیونې تایید کړې وې خو یادونه یې کړې وه چې هغوی له لنډې مودې وروسته بېرته پرېښودل شوې دي.
په افغانستان کې د ملګروملتو مرستندوی ماموریت، یوناما نن د طالبانو له لوري په وروستیو کې د بدحجابۍ په تور د نجونو او ښځو پر نیونو ژوره اندېښنه ښکاره کړه.
یوناما په یوه خبرپاڼه کې ویلي، داسې اسناد یې ترلاسه کړي چې د طالبانو د امربالمعروف او نهي عن المنکر وزارت کسانو د روانې جنورۍ له لومړۍ څخه په کابل او دایکنډي ولایتونو کې د بدحجابۍ په نوم یو شمېر ښځې او نجونې نیولي دي.
د ملګروملتو مرستندوی ماموریت همداراز وايي چې په پلازمېنه کابل کې ډېر شمېر ښځو او نجونو ته خبرداری ورکړل شوی او نیول شوي. همداراز د دایکنډي ولایت په مرکز نیلي کې هم ښځې او نجونې نیول شوي دي.
طالبانو په کابل او نورو ولایتونو کې د حجاب په نوم د ښځو د نیونو په اړه ضد و نقیض څرګندونې کړي دي.
ځینو طالب چارواکو په دې تړاو د چا د نیولو ادعا رد کړې، ځینو نورو یې تایید کړې او ځینو یې بیا ویلي چې د لنډ وخت لپاره یې یو شمېر بد حجابه ښځې نیولي او بېرته خوشي کړي دي.
افغانان د خپل وطن ، دین او ناموس په هکله ډېر حساس دي ، هر هغه چا چې دغو مسایلو ته په سپکه سترګه کتلي ، پایله یې داسې ورکاوی دی ، چې بیا به هېڅکله افغانستان ته راستانه نه شي .
خلک او پرچم ، ستم او شعله چپ ګوندونو د افغانستان دین ته په سپکه وکتل له خپلو مجاهدنما مشهور قوماندانانو سره لکه احمد شاه مسعود ، تورن اسمعیل ټول له دې وطنه ورک شول .
جمهوریت والو د نړیوالې ټولنې په نوم له وطن او خاورې سره خیانت وکړ، حال یې تاسو ټولو ولید. هغه درې نړیوالې زورواکې امپراتورۍ چې دلته یې ماته وخوړه ، زمونږ پر وطن د تعرض او سپکاوي له امله مخ توري شول .
له ښځو سره سپک ،غیر انساني او غیر اسلامي چلند لومړي سقاو ، ټالبانو د ملاعمر په واکمنۍ کې تاسو ولید چې په نتیجه کې د ولس د غوسې له امله په زرګونو جنګیالی یې له خاورو لاندې شول .
دغو مودرنو ملایانو لکه چې بیا له خپلو پرونیو اشتباه ګانو څه زده نه کړل ، له ښځو ، معارف او لوړو زده کړو سره د دښمني له امله هغه بیا تکراروي ، او که داسې یکته تازي کوي ، د جهالت له خرو را ښکته نه شی ، خاتمه به یې تر ټولو بده وي .