تاند (سې شنبه، د قوس ۱۴ مه) ترکي رسنیو ویلي چې د دغه هېواد ځواکونو د چانک قلعه سیمې په سمندري سواحلو کې ۳۸ تنه افغان پناه غوښتونکي نیولي چې بیرته به یې خپل هېواد ته ستانه کړي.
ویل شوي چې یاد شوي پنا غوښتونکي د ترکیې له لارې اروبایي هېوادونو ته د تګ په تکل کې وو.
ترکیه له پخوا راهیسې په ناقانونه ډول اروپا ته د افغان پنا غوښتونکو د تګ مسیر دی.
په وروستیو کې ترکیې د پنا غوښتونکو او کډوالو پر وړاندې خپل دریځ توند کړی او له دې ډلې یې سلګونه افغانان له نیولو او شکنجې وروسته خپل هېواد ته ستانه کړي.
افغان کډوالو سره د ترکیې پر چلند بیا- بیا نیوکې شوي،
یو ځل د طالبانو د کډوالو او بیرته ستنیدونکو چارو وزیر خلیل الرحمان حقاني هم د افغان کډوالو د ستونزو د حل لپاره د په زوره ستنولو پر ځای د ترکیې د نورو اقداماتو غوښته کړې وه، خو څارونکي په ټوله کې د افغان کډولو د حقونو په دفاع کې د طالبانو د رژیم دریځ او عمل د قناعت وړ نه بولي.