تاند- نن د ډسمبر درېیمه د معذورانو (معیوبانو) نړیواله ورځ ده.
په افغانستان کې د سره صليب کمېټه وايي، شاوخوا ۴،۴ ميليونه کسان بېلابېل جسمي معلولیتونه لري.
ياده کمېټه وايي، په افغانستان کې په اوو مرکزونو کې د فزیکي بیارغونې د پروګرام په پیلولو هر کال له ۲۰۰ زره کسانو سره مرسته کوي.
د شهیدانو او معلولینو چارو وزارت د کړنلارې له مخې چې د پخواني جمهوري حکومت پر مهال چمتو شوې وه، هر کال معذورانو ته ۶۰ زره او جزوي معلولانو ته ۳۰ زره افغانۍ مرستې ورکول کېدې، خو د دغو معذورانو په وینا اوس د مرستو اندازه ۳۶ زره او ۱۸زره ته راټیټه شوې ده.
د ملګرو ملتونو د عمومي اسمبلې د پرېکړې پر اساس، له ۱۹۹۲ راهيسې هر کال د دسمبر درېیمه د معذورانو یا معلولیت لرونکو وګړو د نړیوالې ورځې په توګه لمانځل کېږي.
د معلولیت لرونکو وګړو د نړیوالې ورځې د نومولو موخه د معلولیت اړوند مسئلو په اړه د عامه پوهاوي لوړول او د معلولیت لرونکو کسانو د وقار، حقونو او هوساینې ملاتړ کول دي.
د ملګرو ملتونو د ۲۰۲۳ کال د دې ورځې شعار “د معلولیت لرونکو وګړو لپاره د دوامداره پراختیايي اهدافو د ترلاسه کولو لپاره په ګډه کار کول” دی.