تاند(چارشنبه، د قوس۸ مه) راپورونه وایی چې د طالبانو استخباراتو په بدخشان کې د حزب تحریر ګڼ غړي نیولي او بندیان کړي.
د نیول شویو دغو کسانو شمېر ۴۵ تنه ښودل شوی او ویل شوي چې دوی له تېرې یوې اوونۍ راهیسې د جلا- جلا عملیاتو پر مهال نیول شوي.
حزب تحریر ډله چې د داعش په شان په نړۍ کې د اسلامي خلافت د ټینګولو ادعا لري، له اوږدو کلونو راهیسې د افغانستان په یو شمېر مرکزي او شمالي ولایتونو کې رېښې لري.
طالبانو په رسمي ډول د دغې ډلې د کسانو د نیولو په تړاو څه نه دي ویلي.
یو شمېر شنونکي د یادې ډلې خلاف عملیات د افغانستان له شمالي ولایتونو څخه د یو شمېر ګاونډیو هېوادونو د امنیتي اندېښنو د حلولو لپاره مهم بولي او ټینګار کوي چې که طالبان په رېښتیا د نړیوال تروریزم له ډلو سره په اړیکو پرې کولو وتوانیږي، له نړیوالو سره د اړیکو په ښه کیدو کې به یې ډېره ګټه ولري.
د یادونې وړ ده چې حزب تحریر ډلې په دوحه کې د طالبانو او امریکا د سولې تړون له لاسلیک وروسته، د طالبانو خلاف توندې اعلامیې ورکړې وې او دا یې امریکا ته د طالبانو تسېلمي او د نیابتي جنګیالیو په رول کې یې څرګندیدل بللي وو.