تاند(یکشنبه، د عقرب ۲۸مه) د افغانستان د خبریالانو مرکز په یوه تازه راپور کې خبریالانو او رسنیو سره د طالبانو د ناوړه چلند په اړه راپور خپور کړی او ویلي، چې تېرو ۶ میاشتو کې طالبانو په ۴۲ پېښو کې خبریالان ګواښلي او ۳۳ تنه یې بندیان کړي.
د راپور له مخې، د خبریالانو د نیولو ټول اقدامات د طالبانو د استخباراتو له خوا شوي او د خبریالانو یا هم رسنیو په ګواښولو کې د استخباراتو تر څنګ د طالبانو د اطلاعاتو او کلتور وزارت او د امر بالمعروف وزارت شامل دي.
د افغانستان د ازادو رسنیو د ملاتړ بنسټ، نی د معلوماتو له مخې، په افغانستان کې د طالبانو له واکمنۍ راهیسې ۲۸۱ رسنۍ تړل شوې دي او له ۱۱۸۵۸ رسنیزو کارکوونکو څخه یوازې ۴۵۰۰ یې کار کوي.
د افغانستان د خبریالانو مرکز په وینا، یوازې په ولایتونو کې نه؛ بلکې په کابل کې هم د ازادو رسنیو عادي بهیر ګډوډ شوی او د ازادو یا هم تحقیقي راپورونو او چېلنجوونکو پروګرامونو جوړول د محدودیتونو له کبله ختم شوي دي.
طالب چارواکو دغه راپور ته غبرګون نه دی ښودلی، خو په ټولیز ډول یې تل داسې راپورونه او څرګندونې رد کړي دي.