تاند (یکشنبه، د عقرب ۲۸ مه) ټاکل شوې ده چې د ۲۰۲۳ د کرکټ په نړیوال جام کې نن د هند او استرالیا پیاوړې لوبډلې په پایلوبه کې له یو بل سره مخامخ شي.
هند په دې جام سیالیو کې د نیمه پایلوبې په ګډون ۱۰ مسابقې کړي او ټولې یې ګټلي خو استرالیا په تېرو لسو سیالیو کې ۸ ګټلي دي.
پایلوبه د احمداباد په نریندرا مودي لوبغالي کې کېږي.
د پایلوبې لیدو ته د هند او نړۍ د یو شمېر سیاسي شخصیتونو، نامتو لوبغاړو او د بالیووډ د مشهورو ستورو ترڅنګ شاوخوا یوسلو ۳۰ زره نندارچیان لوبغالي ته راځي.
د ۲۰۲۳ نړیوال جام، چې د هند په کوربه توب ترسره شو، د افغانستان لپاره له ډېرو بریاوو ډک و. افغانستان نه یوازې ۴ ټیمونه مات کړل بلکې د استرالیا په شمول د څو نورو ټیمونو ماتولو ته هم نژدې شو.
دغو بریو افغانستان د کرکټ بل نړیوال جام ته بې له دې چې د غوراوي لپاره نورو سیالیو ته اړتیا پیدا کړي، لاره وموندله.