تاند:( دوشنبه، د عقرب ۸ مه) د ننګرهار ځايي چارواکو په دغه ولایت کې د زیتونو په حاصلاتو کې د تېر کال په پرتله د ۵۰ سلنه ډېروالي خبر ورکړی دی.
د دغه ولایت د کانال ریاست لپاره د طالبانو رئیس مولوي غلام رحمان کاظم وویل چې تېر کال د زیتونو حاصلات ۱۶۱ ټنه وو، خو سږ کال دغه اندازه ۳ سوه ټنو ته لوړه شوې ده.
نوموړي همدارنګه وویل په پام کې ده، چې د دغو زیتونو څخه ۳۰ زره لېټره د زیتونو تېل او ۱۱ ټنه د زیتونو اچار جوړ او بازار ته وړاندې شي.
د هغه به وینا، دمګړۍ د ننګرهار کانال ریاست اړوند شرکتونو کې ۴زره ۵۰۰ نارینه او ښځینه کارکوونکي په مستقیم او غیر مستقیم ډول په کار بوخت دي.
د طالبانو له بیا واکمنیدو سره، د ننګرهار کانال د فعالیتونو د ښه کیدو خبرونه ورکول کیږي.