تاند:( پنجشنبه، د میزان ۱۳مه) د نړۍ ۸۰ هېوادونو په ګډه د یوه پریکړه لیک له خپرولو سره د طالبانو له رژیم څخه غوښتي، چې د ښځو او بشر د حقونو نقض نور پای ته ورسوي.
په دغه اعلامیه کې د ښځو پر وړاندې د طالبانو فرمانونه، سیسټماټيک تبعیض، ځپونکي او له تاوتریخوالي ډک ګڼل شوي او له اسلامي امارته غوښتل شوي چې افغان نجونو او ښځو ته بيرته په سیاسي او ټولنیز ژوند کې د بشپړ، مساوي او معنا لرونکي ګډون زمینه برابره کړي.
د طالبانو د رژیم ویاند مجاهد بیا په دې اړه شوې نیوکې رد کړي او ویلي:«هغه حقوق چې اسلامي شریعت ښځو او نجونو ته ورکړي په افغانستان کې هغه نه چا نقض کړي او نه ترې سرغړونه کولای شي. بلکې امارت د وجیبې په توګه هغې ته رسېدنه کوي او دا فرض ګڼي چې هغوی ته خپل حقوق ورکړي.»
د طالبانو رژیم د ښځو او بشري حقونو د نقض له امله تل له ستونزو سره مخ شوی.
د طالبانو له بیا واکمنیدو سره، دوی په پرله پسې ډول پر ښځو بندیزونه لګولي چې له مخې یې نجونې له شپږم ټولګي د پورته زده کړو، ښځې له روغتیایي او ځینو نورو محدودو برخو پرته د کار، ټولنیز حضور، په خپله خوښه د لباس، ګرځیدو او ډېرو نورو مسایلو حق نه لري.
طالبان له دې امله په ملي او نړیواله کچه سختو نیوکو سره مخ دي، خو مشران یې ادعا کوي چې د ښځو حقونه یې نقض کړي نه؛ بلکې د هغه څه له مخې تامین کړي، چې دوی یې «اسلامي شریعت» بولي.