تاند (سې شنبه، د اسد ۱۷مه) د طالبانو د ریاست الوزرا د اقتصادي مرستیال ملاعبدالغني برادر اخوند په مشرۍ یو پلاوی نن ترکیې ته روان شو.
د طالبانو د حکومت د ریاست الوزرا د مرستیال دفتر په یوه خبرپاڼه کې ویلي چې د ملاعبدالغني برادر په مشرۍ دا پلاوی به د خپل رسمي سفر په ترڅ کې پر ترک چارواکو سربېره په ترکیه کې له مېشتو افغان پانګوالو سره وګوري او په افغانستان کې د پانګونو په اړه به په یو مهم کنفرانس کې هم ګډون وکړي.
د طالبانو له واکته رسیدو وروسته دا لومړی ځل دی چې د ريیس الوزرا د مرستیال په کچه یو طالب چارواکی له افغانستانه بهر ته سفر کوي.
د ریاست الوزرا د مرستیال دفتر په خبرپاڼه کې دا یادونه نه ده شوې چې ښاغلی برادر به له کومو ترک چارواکو سره وګوري. د طالبانو حکومت تراوسه د ترکیې په ګډون د نړۍ هېڅ هېواد په رسمیت نه دی پېژندلی خو د ترکیې حکومت د ۲۰۲۱ په اګست کې د طالبانو له واک ته رسیدو راوروسته د طالبانو له حکومت سره تعامل ته دوام ورکړی او بشري مرستې یې افغانستان ته رالیږلي دي.
ترکیې د طالبانو د واک ته رسیدو په لومړیو کې ډیره هڅه وکړه چې د کابل د هوايي ډګر عملیاتي چارې په غاړه واخلي.