تاند: ( دوشنبه، د زمري ۱۶ مه ) د افغانستان د ګاونډي هېواد تاجیکستان یوه مقام ویلي، چې د طالبانو له بیا واکمنیدو سره دغه هېواد د افغانستان- تاجیکستان پر پولې شاوخوا ۱۰۰ نوې سرحدي پوستې جوړې کړي.
د تاجیکستان د امنیتي څېړنو د یوه مرکز مشر خیرالدین عثمانزاده ویلي، چې د دې پوستو جوړولو اصلي انګېزه هغه اندېښنې دي، چې د افغانستان له خاورې دوی ته د امنیتي ګواښونو له پلوه پیدا شوې دي.
هغه په افغانستان کې د تاجیکستان د حکومت د مخالفې وسله والې ډلې انصارالله د جنګیالیو د موجودیت ادعا کړې او ویلي، چې د احتمالي خطرونو د مخنیوي لپاره یې نوې سرحدي پوستې جوړې شوې دي.
په افغانستان کې د طالبانو واکمن رژیم بیا تل رد کړې، چې ګوندې له افغان خاورې کوم هېواد ته خطر پېښ وي، یا د کوم ګاونډي هېواد د حکومت مخالف وسله وال په افغانستان کې مېشت وي.
تاجیکستان د طالبانو د رژيم یو شمېر مخالفو څېرو؛ په سر کې د ملي مقاومت په نوم جنګي ډلې ته پناه ځایونه ورکړي، چې له دې امله یې طالبانو سره وخت په وخت ناندرۍ رامنځته شوي.