تاند:( پنجشنبه ، د جوزا ۴ مه ) د امریکايي رسنیو د راپورونو له مخې، د جوبایډن حکومت ځینو ادارو لکه: «سیګار» ته اجازه نه ورکوي، چې له افغانستانه تر وتو وروسته دغه هېواد ته د ۸ میلیارده ډالرو بستې د لېږلو په اړه معلومات ترلاسه کړي.
د امریکا د ولسي جرګې د څارنې کمیټې ویلي، وروسته له دې چې افغانستان ته د امریکايي پوځیانو له وتلو وروسته د ۸ میلیاردو ډالرو بسته واستول شوه، د بایډن اداره په دې اړه د داخلي تحقیقاتو مخه نیسي او نه پریږدي دوی پوه شي، چې له دغو مرستو څخه څومره پیسې د طالبانو لاس ته ورغلي دي.
ویل شوي، چې د امریکا د بهرنیو چارو وزارت او د امریکا نړیوالې پراختیايي ادارې خپل کارکوونکي منع کړي چې د افغانستان د بیارغونې لپاره د امریکا د متحده ایالاتو د تفتیش د دفتر له ځانګړي مفتش جان سیپکو سره مرکه وکړي.
دې کمیټې د بهرنیو چارو وزیر انتوني بلینکن، د مالیې وزیر جینت ییلن او د USAID مشرې سمانتا پاور ته په خپل لیک کې ویلي: د همکارۍ نشتوالی د منلو وړ نه دی. یو با صلاحیته حکومت د سیګار له څارنې نه شرمیږي او نه هم په افغانستان کې د امریکا ولس ته د خپلو ناکامیو له حساب ورکولو سترګې پټوي.
د امریکا د بهرنیو چارو وزارت او په کابل کې د طالبانو حاکم رژیم دواړو له جمهوریت وروسته افغانستان ته د ۸ میلیارده ډالرو استول او له دې پیسو څخه طالبانو ته ګټه رسیدل رد کړي.