تاند:( یکشنبه ، د غویي ۳۱ مه ) سعودي عربستان ته د افغان حج کوونکو د لېږد لومړنی پرواز تېره شپه له کابل هوایي ډګر څخه ترسره شو.
د طالبانو د رياست الوزرا اداري مرستيال مولوي عبدالسلام حنفي په دې مراسمو کې وویل، چې په سعودي کې د هيواد د حاجيانو د لېږد او ځای پر ځای کولو لپاره غوره اسانتياوې رامنځته شوي او په کور دننه او بهر د هيواد حاجيانو ته د غوره خدمتونو برابرولو په موخه مختلفې کمېټې ګمارل شوې دي.
نوموړي زياته کړه، د تېر کال په پرتله سږکال د حج پروسې لګښت کم دی او د پيسو راټولولو او لېږد په برخو کې هم د حاجيانو له پيسو څخه د خدمت حق نه دی اخيستل شوی، چې دا د حاجيانو لپاره يو ډول مراعات دی.
مولوي حنفي وویل، سږ کال زموږ له هيواد څخه ۳۰ زره حاجيان د حج مراسمو کې ګډون کوي.
افغان حج کوونکو تېر کال د طالبانو له اړوندو تدابیرو خوښي ښودلې وه.