تاند:( چارشنبه ، د غویي ۷ ) د کندهار په لسو ولسوالیو کې د وړیو راټولولو مرکزونه جوړیږي.
د کندهار د کرنې او مالدارۍ ریاست لپاره د طالبانو د رژیم واکمنانو ویلي، چې د دغو مرکزونو له جوړیدو سره به شاوخوا زر کسان په کار وګمارل شي.
یوه اړوند طالب مقام مولوي شمس الرحمن موسی وویل، دا پروژه د D C A موسسې په مالي لګښت په ارغنداب، معروف، خاکرېز، پنجوایي، میوند، تخته پل، ژړۍ او شاولیکوټ ولسوالیو کي پيلیږي.
سرچینه زیاتوي، د دې پروژې له پيل سره په یادو سیمو کې د پسونو او وزو د وړیو راټولولو مرکزونه جوړیږي.
د ملا موسی په وینا، دا لومړی ځل دی، چي د کندهار په ولسوالیو کې د وړیو د ټولولو پروژه پيلیږي.
هغه زیاته کړه، چي په یادو مرکزونو کي وړۍ راټولیږي او وروسته د نساجي فابریکې ته د بسته بندۍ لپاره استول کیږي.