تاند:( چار شنبه، د کب ۲۴) د کډوالو په چارو کې د ملګرو ملتونو عالي کمېشنرۍ وايي، سږ کال یې په ایران، پاکستان، تاجکستان، ترکمنستان او ازبکستان کې د افغان کډوالو د ستونزو د حل لپاره د ۶۱۳ میلیونه ډالرو مرستې پلان وړاندې کړی دی.
دا پیسې د 7.9 ملیون کډوالو سره د مرستې لپاره غوښتل شوي، چې 5.2 میلیونه یې افغان کډوال دي او نور 2.7 میلیونه یې په سیمه ییزو هېوادونو کې مېشت افغانان دي.
ياد شوي هېوادونه د دوه ميليونو راجستر شويو افغان کډوالو په ګډون د ۸،۲ ميليونو افغانانو کوربه توب کوي.
د دغو کډوالو ډیری یې په دې هیوادونو کې د لسیزو راهیسې مېشت دي، چې ډیری یې په ایران او پاکستان کې ژوند کوي.
د کډوالو په چارو کې د ملګرو ملتونو د عالي کمېشنرۍ ویاندې شیبا منټو په یوه خبري غونډه کې وویل چې په ژنیو کې د ملګرو ملتونو یوه دفتر د دغه سازمان له شریکانو غوښتي چې د ۶۱۳ میلیونو ډالرو د مرستې وړاندیز له افغان کډوالو سره وکړي.
د رسنیو د راپورونو له مخې په ایران او پاکستان کې ډېری افغان کډوال تمه لري چې ملګري ملتونه له دوی سره په بېلابېلو برخو کې مرسته وکړي.
د کډوالو په چارو کې د ملګرو ملتونو عالي کمېشنرۍ هم یادونه کړې چې د ۲۰۲۲ کال لپاره هم ورته د مالي مرستې غوښتنه شوې وه، خو د ۶۲۳ میلیونه ډالرو په ګډون یوازې ۵۲ سلنه ورکړل شوې او تر اوسه ۳۲۱ میلیونه ډالر ترلاسه شوي دي.