تاند: ( پنج شنبه، د کب ۱۸ مه) په پکتیکا ولایت کې چارواکي وايي، د ښځینه ډاکټرانو د کموالي له امله یې نارینه ډاکټران ګمارلي دي .
د دغه ولايت يو شمېر اوسېدونکي له لېرې پرتو ولسواليو روغتونونو ته راځي او پر چارواکو يې غږ کوي، چې د دوى ستونزې هوارې کړي.
ګل بي بي د خوشامند ولسوالۍ اوسېدونکې ده. هغه تر شپږ ساعته مزل وروسته روغتون ته راغلې او وايي، چې د روغتونونو د نشتوالي له امله ګڼې مېرمنې له سختو ستونزو سره مخ شوې دي.
ګل بي بي وویل، “هیڅ ډاکټر نشته، او موږ باید روغتون ته ډیر لیرې راشو.”
د پکتيکا يوه اوسېدونکي سرور خان وويل: “که ناروغ له لرې څخه راشي، نو ځينې وخت په لاره کې خپل ناروغان له لاسه ورکوي.”
د مرکزي روغتون يو شمېر ښځينه ډاکټرانې وايي، چې د ناروغانو د زیاتوالي له امله د ټولو ناروغانو درملنه نه شي کولای.
د اقرا په نامه یوې ډاکټرې وویل، “په ټول پکتیکا کې موږ یوازې دوه متخصص ډاکټران لرو چې په دې روغتون کې دي او موږ له ننګونو سره مخ یو.”
د مرکزي روغتون مشر، محمد یحیی یار وویل: “موږ د طبي توکيو کمښت هم لرو.”
د پکتیکا د عامې روغتیا رئیس حکمت الله حکمت وویل:«په پکتیکا ولایت کې یوازې دوه متخصصین لرو، په مرکزي روغتون کې د ښځینه ډاکټرانو بستونه خالي دي او هڅه کوو چې نارینه ډاکټران وګمارو.
د پکتیکا مرکزي روغتون په تېره یوه میاشت کې ۱۵۰ بسترونو ته لوړ شوی خو لا هم د ښځینه ډاکټرانو له کمښت سره مخ دی.
پکتیکا ولایت ۱.۵ میلیونه نفوس لري، خو یوازې درې روغتونونه او دوه ښځینه ډاکټرانې لري.
په دغه ولايت کې د نجونو د زده کړو کموالی او په دې اړه ناسم کولتوري برداشتونه له لویو ستونزو ګڼل کېږي.