تاند (پنجشنبه د تلې ـ میزان ۲۴مه) د طالبانو د حکومت د کډوالو او راستنېدونکو چارو وزیر، مولوي عبدالکیبر د افغانستان لپاره د اروپايي ټولنې له ځانګړي استازي «جېلس برتران» او مل پلاوي سره په کتنه کې د کډوالو اړوند او وروستیو سیمهییزو مسایلو په اړه خبرې کړې دي.
د یاد وزارت په اعلامیه کې ویل شوي چې د اروپايي ټولنې شارژدافیرې او د بشري مرستو د برخې مسؤلینو هم برخه لرله او دوی افغان راستنېدونکو ته د مرستو رسولو او ورستیو سیمهییزو مسايلو په هکله بحث کړی دی.
اعلامیې لیکلي چې په دې کتنه کې جېلس برتران ویلي چې اروپايي ټولنې د افغان راستنېدونکو لپاره روان کال نږدې ۵۰ میلیونه یورو ځانګړې کړې دي، چې د ملګرو ملتونو د ادارو او انجېو ګانو لخوا به مصرف شي.
نوموړي په افغانستان کې د اروپایي ټولنې د کار د دوام یادونه کړې او په وینا یې چې اروپایي هېوادونو د افغانانو اړتیاوو ته په پام سره خپلې مرستې ډېرې کړې دي.
د افغانستان لپاره د اروپايي ټولنې له ځانګړي استازي همداراز د افغانستان او پاکستان ترمنځ پر وروستیو نښتو د اندېښنې څرګندولو ترڅنګ ویلي چې ورته موضوعګانو بشري حالت اغېزمن کړی او راستنېدونکي یې له ستونزه سره مخ کړي دي.
د طالبانو کډوالو او راستنېدونکو چارو وزارت په اعلامیه کې یادې ټولنې له کابل او اسلام آباد غوښتي چې خپلې ستونزې د خبرو له لارې حل کړي.
بلخوا مولوي عبدالکبیر له افغانانو سره د اروپايي ټولنې له بشري مرستو مننه کړې او ویلي یې دي چې اسلامي امارت له اروپایي ټولنې او اروپايي هېوادونو سره د اړیکو پراختیا ته لېواله دی.
د کډوالو چارو وزیر همداراز په افغانستان کې اقلیمي بدلونونه او د کډوالو راتګ بشري مرستو ته د اړتیا سبب یاد کړی او څرګنده کړې یې ده چې نړۍ دې بشري مرستې نه سیاسي کوي.