تاند: ( چار شنبه، د کب ۱۷ مه) په بلخ کې د طالبانو او وسله والو کسانو د يوې ډلې د نښتې پر مهال ۸ وسله وال وژل شوي او ۲ طالبان ټپيان دي.
د دې ولايت لپاره د طالبانو امنيتي چارواکو ويلي، چې وژل شوي وسله وال « ياغيان او اختطافګر» دي.
طالبان وايي دغه نښته تېره شپه د بلخ ولايت د اوومې امنيتي حوزې اړوند په خواجه خيران سیمه کې شوې ده.
طالبانو د دغې نښتې په اړه ډېر جزییات نه دي ورکړي.
دوی په وروستيو کې ډېرو مخالفانو ته ېې د « بغاوت ګرو او اختطافګرو» اصطلاح کاروي.
د طالبانو مخالفو وسله والو ډلو په دې اړه څه نه دي ويلي.