راحت زیارمل
پوره درویشت ویشت کاله وړاندې طالبانو د خپلې واکمنۍ په وروستیو میاشتو کې افغانستان ته یو نه جبرانېدونکی زیان واړاوه او هغه په بامیان کې د بودا تر ټولو د سترو او لرغونو مجسمو ړنګول وو.
شمامه او صلصال د اسلام له ظهور څخه شاوخوا ٤ پېړۍ وړاندې د بودايي دین پیروانو د بامیان ولایت په مرکز کې له غره تراشلي وو چې یو یې ٥٣ مټره او بل یې ٣٥ مټره لوړوالی درلود.
دغه لرغوني تاریخي اثار د ټانک او توپ په ګولیو نه ړنګېدل نو له پاکستانه یې ورته بارود او د ډبرو د چاودنو ماهرین راوړل او له برمه کولو وروسته یې له بارودو ډک او بیا انفجار ورکړ.
د بودا د تاریخي مجسمو د ړنګولو په ورځ د دې ډلې پخواني مشر ملاعمر ٤٠٠٠ غوایان قرباني کړل. هغه وخت د نورو هېوادونو او بنسټونو تر څنګ د اسلامي نړۍ ځينو مشهورو علماوو هم دغه کار وغانده او دا یې د تاریخي زیان تر څنګ د مذهبونو سپکاوی یاد کړ.
د بودا دغه سترې مجسمې د یونسکو له خوا د نړۍ په سترو عجایباتو کې د چین دېوال، د هند تاج محل، د برازیل مسیح، او د مصر اهرامونو تر څنګ یوه مهمه عجوبه شمېرل شوې وه.