تاند (چهارشنبې، د کب/ حوت ۲۰ مه) د پاکستان رسمي سرچینو د سېشنبې په ورځ هغه راپورونه رد کړل چې ګواکي د حکومت له لوري استول شوی درې کسیز پلاوی له افغانستان سره د روانې جګړې د پای ته رسولو په اړه خبرې اترې کوي.
ډان او څو نورو پاکستاني رسنیو د خپل هیواد د نامعلومو امنیتي چارواکو په قول پرون (سېشنبه) وویل چې دا ډول ادعاوې په ټولنیزو رسنیو کې د «افغان تبلیغاتي اکاونټونو» له لوري خپرې شوې دي. د افغانستان طلوع نیوز هم د یوې نامعلومې سرچینې په حواله ورته راپور خپور کړی و.
پرون څو افغاني رسنیو د خپلو سرچینو په قول وویل چې د مولانا فضلالرحمان خلیل په مشرۍ د پاکستان یو درې کسیز پلاوی کابل ته راغلی دی.
سرچینو ویلي، دغه پلاوی د دې لپاره افغانستان ته راغلی چې د اختلافونو د حل او د کابل او اسلامآباد ترمنځ د وروستیو کړکېچونو د کمولو لارې چارې وڅېړي.
په پاکستاني پلاوي کې د مولانا فضلالرحمان خلیل تر څنګ، مولانا عبدالله شاه مظهر او مولانا سجاد عثمان هم شامل دي.
خو د پاکستان رسمي سرچینو ټینګار کړی چې دا راپورونه حقیقت نه لري او پاکستان کابل ته هېڅ ډول پلاوی نه دی استولی.
سرچینو زیاته کړه چې د پاکستان دریځ روښانه دی: افغان طالبان باید د «فتنه الخوارج» له ملاتړ څخه لاس واخلي او د هغوی خلاف پرېکنده اقدام وکړي.
د دوی په وینا، تر هغې پورې به له افغان طالبانو سره هېڅ خبرې ونه شي، او پاکستان به په افغانستان کې د «فتنه الخوارج» پر پټنځایونو خپلو عملیاتو ته دوام ورکړي.
«فتنه الخوارج» هغه اصطلاح ده چې د پاکستان دولت یې د ټي ټي پي لپاره کاروي.
پاکستان په داسي حال کې کابل ته د پلاوي استول ردوي چې د افغانستان او پاکستان ترمنځ لارې بندې دي او له پاکستانه هیڅوک د اسلام اباد له موافقې پرته کابل ته سفر نه شي کولی.
پاکستان تر دې پخوا هم له افغان طالبانو سره د خبرو لپاره مذهبي مشران افغانستان ته رالیږلي دي. له همدې کبله پاکستاني رسنیو د خپل حکومت د سرچینو په قول ویلي چې د دې هیواد حکومت افغانستان ته رسماً کوم پلاوی نه دی لېږلی.