تاند (شنبه، د حوت ۱۳مه) په ایټالیا کې د افغانستان سفارت وايي، د ایټالیا سواحلو ته نژدې د کډوالو د ډوبې شوې بیړۍ په قربانیانو کې ۳۲ تنه یې افغانان وو.
د روان حوت په اتمه د پناه غوښتونکو بیړۍ د ایټالیا د جنوبي ښار کرتون ساحل ته نژدې ډوبه شوه.
په روم کې د افغانستان سفارت په یوه خبرپاڼه کې د ۳۲ افغانانو د مړینې د تاییدولو ترڅنګ ویلي چې یو شمېر نور افغانان په دې پېښه کې ژوبل شوي دي.
اوس ۵ تنه لا هم په روغتون کې دي او ۷۲ نور افغانان د کروتون ښار د کډوالو په مرکز کې ساتل کېږي.
د سفارت له خبرپاڼې سره سم، غالباً په بیړۍ کې شاوخوا ۱۸۰ تنه سپاره وو خو تراوسه پورې د ۶۸ تنو مړي موندل شوي دي.
د موندل شویو کسانو مړي د هغوی د کورنیو د غړیو له لوري پېژندل شوي دي. همداراز د قربانیانو خپلوانو اجازه ورکړې چې یو شمېر کسان د پېښې سیمې ته نژدې د کروتون ښار په هدیره کې خاورو ته وسپارل شي.
په ایټالیا کې د افغانستان سفیر خالداحمد زکریا وویل، د ایټالیا د باندنیو چارو وزارت له چارواکو سره یې کتلي او له هغوی څخه یې غوښتي چې د دې پېښې په اړه پلټنې وکړي.