تاند ( شنبه د تلې – میزان ۱۱مه) افغانستان لپاره د امریکا پخواني استازي، خلیلزاد په اسلاماباد کې د تګ راتګ د محدودیتونو او د سړکونو د تړل کېدو په اړه د یوه راپور په غبرګون کې، د پاکستان د پلازمینې پر وضعیت نیوکه کړې ده.
خلیلزاد په اېکس ټولنیزه شبکه کې اسلاماباد «کانټینرااباد» بللی او لیکلي یې دي چې د پاکستان خلک د دې څخه د غوره شرایطو مستحق دي.
نوموړي په دې پوسټ کې د الجزیرې راپور چې، په پلازمېنه اسلام اباد کې د ارتباطي لارو د تړل کېدو پایلو ته یېاشاره کړې ده هم خپور کړی دی.
هغه ویلي، چې د سړکونو تړل کېدو، پر تګ راتګ د اغېز سربېره، د بار وړونکو موټرو چلوونکو ته درانه مالي زیانونه اړولي دي.
خلیل زاد لیکلي چې، دا محدودیتونه په داسې حال کې دوام لري چې د اصلي لارو تړل کېدو په اسلاماباد کې ورځنۍ چارې او د توکو لېږد رالېږد له ستونزو سره مخ کړي دي.