تاند (دوشنیه، د حوت ۸ مه) په کاناډا کې مېشت افغان بوکسر هلمند الکوزي تېره شپه د کاناډا یوه تکړه بوکسر کودي کیلي ته په اتم راونډ کې ماتې ورکړه.
دا د سوک په حرفوي لوبو کې د هلمند الکوزي نهم بری دی.
دا مسابقه د انتاریو ایالت د برومتن ښار په پنځه زره کسیز لوبغالي کې وشوه.
هلمند الکوزي له ۲۰۱۱ کال څخه بوکس لوبه په اماتور ډول پیل کړه خو د ۲۰۱۵ په وروستیو کې یې حرفوي سوکلوبې ته مخه کړه. په دې موده کې یې تراوسه ۹ بري په برخه شوي او هیڅ سیالي یې نه ده بایللې.
ده د چک جمهوریت، ارجنټاین، هسپانیا، کاناډا، مکسیکو او هنګري لوبغاړو ته ماتې ورکړي دي.