تاند: ( دوشنبه، د حوت ۸ ) د ننګرهار لپاره د طالبانو د امنيې قوماندانۍ د دعوت او ارشاد مديريت مسوولينو د جلال اباد ښار په استقلال عالي لېسه کې زده کوونکو ته تبلیغاتي غونډه کړې ده.
د طالبانو د ولایتي ادارې د خبرپاڼې له مخې، په دې غونډه کې د طالبانو د امنیې قومندانۍ استازي مولوي شېرولي (عبيد) په دې غونډه کې د طالبانو د رژیم د فعالیتونو په اړه خبرې کړي او له زده کوونکو يې غوښتي، چې ږیرې پریږدي او پینځه وخته لمونځونه وکړي.
د طالبانو د خبرپاڼې په اساس، د غونډې پر مهال د طالبانو د امنیې قومندانۍ له لوري د یادې لېسې زده کوونکو ته ۸۵ کتابچې هم وېشل شوي.
د طالبانو رژیم تر دې مخکې هم په مختلفو بڼو د ټولنې بېلابېلې برخې تر خپلو تبلیغاتي هڅو لاندې راوستې وې، چې له امله یې توندو نیوکو سره مخ شوي دي.
د پوهنې د چارو کارپوهان باور لري، چې زده کوونکو ته داسې غونډې جوړول د دوی ذهن و روان ځپي.
طالب چارواکي بیا ادعا لري، چې په داسې غونډو د خپل« اسلامي نظام» پښې مظبوطوي.