تاند: ( دوشنبه، د حوت ۸ ) په ټولنیزو رسنیو کې یوه خپره شوې ویډیو څرګندوي، چې د طالبانو سرحدي ځواکونو نیمروز سره پر پوله یو ایرانی پوله ساتونکی نیولی او ډبولی.
د طالبانو چارواکو د دغې ویډیو په اړه څه نه دي ویلي، خو د ایران سپاه پاسداران استخباراتي ځواک ته نیږدې تسنیم خبري اژانس ویلي، چې دا ستونزه حل شوې ده.
سرچینه لیکي:(( د ایران په پوله کې پ نیشه یي موادو بار وړونکی موټر د ایران د پولو د ساتونکو له خوا ودرول شو، دوی دغه موټر معاینه کاوه، چې ډریور تښتیدلی او موټر یې د افغانستان خاورې ته ننویستی، ایراني ځواکونو ورپسې حرکت نه دی کړی، خو طالبانو موټر درولی او د ډریور په ګډون یې په ناپامۍ کې ایراني سرتېری هم ډبولی.))
سرچینه زیاتوي، چې د دغه خبر له خپرېدو سره سم، دا موضوع حل شوې او د ایران د سرحدي ساتونکو د خوشې کولو تدابیر نیول شوي دي.
د طالبانو او ایران د اړیکو یو شمېر منتقدانو، د دغه هېواد له لوري طالبانو ته د افغانستان د سفارت سپارلو مسئلې ته په اشارې لیکلي، چې دا ایران ته د طالبانو د دغه عمل لومړنۍ ډالۍ ده.