تاند: ( دوشنبه، د حوت ۸ ) د کندهار لپاره د طالبانو د رژیم ځایي چارواکي وایي، چې تېره اونۍ په دغه ولایت کې د اور لګیدنې ۱۰ پېښې رامنځته شوي دي.
د کندهار د اطفایې مدیریت اداري مسوول نذیر احمد ذاهد ویلي، چې د دغو پېښو له امله درې میلیونه او څلویښت زره افغانۍ مالي زیانونه رامنځته شوي.
د کندهار لپاره د طالبانو د اطلاعاتو او فرهنګ ریاست د نوموړي له قوله دا هم ویلي، چې د یادو اورلګیدنو پر مهال د اطفایې ادارې په هڅو د شاوخوا درې سوه زره افغانیو د نور زیان اوښتو مخنیوی شوی دی.
سرچینې د دغو اورلګیدنو په اړه نور جزییات نه دي ورکړي.
د طالبانو پر رژیم یوه عامه نیوکه دا ده، چې د اطفایې ادارې په ګډون نیږدې ټولو ادارو کې یې مسلکي کسان له دندو ګوښه او پرځای یې خپل ملایان او جنګیالي ګومارلي، چې دوی د اړوندو ادارو مسوولیتونو ته سمه اوږه نه شي ورکولای.