تاند: ( پنجشنبه، د حوت ۴ ) د طالبانو د ټولګټو وزارت، نن د یوې اعلامیې په خپرولو سره، د کانونو د استخراج په بدل کې، د کابل – کندهار لویې لارې د ترمیم او رغولو خبر ورکړی دی.
د دغه وزارت په اعلامیه کې راغلي دي: ټولګټو وزارت د کابل – کندهار لویې لارې اقتصادي ارزښت ته په کتو سره، پلان لري چې دا لویه لاره په پنځو برخو کې چې (له ارغندۍ چوک څخه تر دوراني بازار، د غزني له مرکز څخه تر پښ کنده، له پښ کنده څخه تر قلات، له قلات څخه تر شهر صفا او له شهر صفا څخه تر مانجه) پورې تقسیم شوې، د کانونو د استخراج په بدل کې له ساختماني او سړک جوړونې شرکتونو سره قرارداد او په اساسي ډول ترمیم او بیاورغوي.
په اعلامیه کې له ټولو هغو داخلي ساختماني او د سړک جوړولو شرکتونو او ملي سوداگرو څخه چې په دې برخه کې د پانګونې لیوالتیا ولري او اړوند شرایط یې پوره کولای شي، غوښته شوې چې د ۱۵ ورځو په موده کې دې د بشپړ معلوماتو د ترلاسه کولو لپاره ټولګټو وزارت ته مراجعه وکړي.
د یادونې وړ چې کابل – کندهار لویه لاره، یوه اساسي او مهمه سوداګریزه لاره ده چې د ګڼو جنوبي او جنوب غربي ولایتونو په نښلون سربېره، له ګاونډیو هېوادنو سره د سوداګریزو توکو په لېږد رالېږد کې اغېزمن ټرانزیټي او اقتصادي رول لري.
د طالبانو دا اقدام ځینو خلکو ستایلی، خو یو شمېر شنونکي باور لري چې افغان کانونو سره د دوی چلند بې باکانه او سطحي دی.