تاند: (پنجشنبه، د کب ۴ مه) د طالبانو د رژيم چارواکو ويلي، چې افغانستان کې په لومړي ځل د VIP بسونو فعاليت پیل شوی.
د طالب چارواکو په وينا، یاد VIP بسونه چې د یوه خصوصي ټرانسپورټي شرکت لخوا نوي وارد شوي دي ځانګړي عصري خدمتونه لري.
روزل شوي مېلمه پال، د انټرنټ وایفای، راحت سیټونه، د کارکوونکو خاص یونیفورم، مسافرينو ته وړیا خوراک او څښاک او د يو شمېر نورې اسانتياوې د دغو بسونو ځانګړنې ښودل شوي دي.
چارواکو ويلي چې دغو بسونو د کابل مزار شريف او کابل کندز تر منځ خپل فعاليت پیل کړی.
د طالبانو د ټرانسپورټ او هوايي چلند وزارت مرستيال ملا عبدالسلام حيدري د دې بسونو د فعاليتونو د پرانيستې پر وخت دغه هڅه ستايلې ده.
د افغانستان له ټرانسپورټي سيستم، په ځانګړي ډول د لويو لارو له دغو خدمتونو خلک ډېر شکايت لري.
له همدې امله د چارواکو له لوري د نويو دغو خدمتونو په اړه خبرې د خلکو له هرکلي سره مخ شوي دي.