تاند:( سې شنبه، د دلوې يوولسمه) د طالبانو د کورنیو چارو وزارت ویلي، چې تېر کال په هېواد کې د قتل ۱۵۹۰ او د ځان وژنې ۳۶۹ پېښې ورسره ثبت شوي.
د طالبانو د دغه وزارت د وياند مرستيال بسم الله حبيب وايي، دوی د قتلونو په تور ۱۸۱۸ تنه نیولي او بنديان کړي دي.
د نوموړي د معلوماتو له مخې، د قتلونو ۱۰۰۹ پېښې ېې تر څېړنو لاندې دي.
سرچینه زیاتوي، چې د قتلونو پېښې تر ډېره د ناموسي مسايلو، کورني تاوتريخوالي، شخصي بدیو او مرموزو وژنو اړوند دي.
طالب وياند له تېر يوه کال راهيسې د ځان وژنې د ۳۶۹ پېښو د ثبت خبر هم ورکړی او ویلي، چې ۶۸ تنه ېې په دې پېښو کې د ملامتۍ په تور نيولي دي.
په ټولنیزو رسنیو کې خلکو د دغه ارقام خواشينونکي ګڼلي او په خاص ډول ېې د ځان وژنې پېښې د فقر، بې سرنوشتۍ او ژورې ملي نهيلۍ نښه ګڼلې ده.