تاند:( پنجشنبه، د دلوې شپږمه) متحده عربي اماراتو، جاپان او فرانسې د افغانستان په اړه د ملګرو ملتونو د امنیت شورا د ځانګړې غونډې د جوړېدو غوښتنه وکړه.
دغو هېوادونو غوښتي، چې ياده غونډه دې د بندو دروازو تر شا وشي.
په ملګرو ملتونو کې د اماراتو د استازي ویاند شهاد مطر ویلي، چې د دوی غوښتنه منل شوې او تمه ده، چې سبا دغه غونډه ترسره شي.
سرچینه زیاتوي، چې د ملګرو ملتونو د سرمنشي مرستیاله آمنه محمد به په دې غونډه کې افغانستان ته د خپل تازه سفر راپور هم وړاندې کړي.
د آمنه محمد د یوې تازه وینا په حواله ویل شوي، چې نوموړي طالبان د ۱۳ مه پېړۍ د افکارو لرونکي ګڼلي او ويلي، چې ۲۱ مې پېړۍ ته بايد ستانه کړل شي.