تاند:( سې شنبه، د دلوې څلورمه) د طالبانو د رژيم د کډوالو او بېرته راستنېدونکو چارو وزیر مولوي خليل الرحمن حقاني د افغانستان او ايران ترمنځ د انساني قاچاق شبکو له فعاليتونو شکایت کوي.
نوموړي په یوه ټلویزیوني مرکه کې وويل، چې د دوی له واکمنيدو وروسته يې هېواد ته د ایران له لوري د وژل شويو څه باندې پينځه نيم سوو ځوانانو د جسدونو د ستنیدو خبر تر لاسه کړی.
ښاغلي حقاني په دې اړه، چې ياد شوي ځوانان د انساني قاچاق شبکو که ایراني ځواکونو وژلي، ډېړ جزییات نه دي ورکړي.
دغه طالب وزير يادې څرګندونې په داسې حال کې کړي، چې څه موده مخکې د ورځې له درې زرو تنو څخه تر پينځو زرو پورې افغانان په ناقانونه ډول ایران ته تلل او د دغه هېواد له لارې ېې اروپايي هېوادونو ته د تګ پلان درلود.
په دې ترڅ کې ایران نه هره ورځ افغانستان ته د سلګونه کډوالو د جبري ستنولو او ورسره د ايراني ځواکونو د وحشيانه چلند راپورونه ورکړل شوي.
د طالبانو چارواکو له ايران څخه غوښتي، چې د نړيوالو اصولو له مخې په جبري ډول د افغان کډوالو له ستنولو ډډه وکړي.
د ښځينه وو او نيږدې ټولو افغانانو پر وړاندې د طالبانو افراطي سياستونه، فقر او شديده نهيلي له افغانستان څخه د ميليونونو خلکو او په خاص ډول د کادرونو د وتو له اصلي لاملونو ګڼل کېږي.