تاند:( پنجشنبه، د جدي ۲۹) د لغمان لپاره د طالبانو د کرنې اوبولګولو او مالدارۍ رئیس مولوي محمد ولي محسن د امریکا د پراختيايي مرستو د ادارې په (۱۹۷۰۰۰) امریکايي ډالرو د کبانو د ۴۰ تولیدي فارمونو د جوړیدو خبر ورکړی.
محسن ويلي ، چې د هر فارم لپاره ۱۰۰۰ متره مربع ځمکه په نظر کې نیول شوې چې د مرکز سربېره په قرغیو، الیشنګ، الینګار او دولت شاه ولسوالیو کې جوړیږي.
سرچینه زیاتوي، هر فارم به د ۱۸۰۰ ماهیانو د تولید ظرفیت ولري چې هممهاله به ټولو فارمونو کې ۱۰۰۰ زر تنو ته د کارروزګار زمینه برابره شي.
نوموړي وویل چې دیادو پروژو په تطبیق سره به د لغمان ولایت سربیره نورو ولایتونو ته دماهیانو صادرات زیات شي .
د ځایي سرچينو د معلوماتو له مخې د ژمي په روان موسم کې په ورځني ډول شاوخوا یو ټن د بهر هېوادونو څخه وارد شوي کبان په لغمان کې خرڅیږي.