تاند:( دوشنبه، د جدي ۲۶) د طالبانو حاکمې ادارې د دوی په بلنه هېواد ته د ۴۷۱ پخوانيو سياستوالو او حکومتي منسوبینو د ستنیدو خبر ورکړی.
له سياسي څېرو سره د طالبانو د اړيکو د کميسيون وياند احمد الله وثیق ویلي:« په دغو کسانو کې پخواني وزيران، واليان، سياسي څېرې، د پخواني ملي شورا يو شمېر غړي او پخواني حکومتي منسوبین شامل دي.»
نوموړي د اړوند کميسيون چارې بريالي ګڼلي، خو څارونکي دا کميسيون نمايشي او بې اغېزې بولي.
د دوی په وينا، که طالبانو د تېرې واکمنۍ په شان ېې بیا د افراطي حکومتولۍ لاره نه وای نیولې او ملت او نړۍ سره ېې تعامل کړی وای، بهر ته تللي افغانان خپله هېواد ته ستنیدل او میلیونونه نور ان په وژونکو قاچاقي لارو له هېواده نه وتل.