تاند:( جمعه، د جدي ۲۳) د افغانستان د پرزول شوي جمهوري نظام يوه مهم چارواکي محمد معصوم ستانکزي د افغانستان د راتلونکي سياسي نظام د څرنګوالي په اړه په وروستيو کې ګرم شویو بحثونو ته غبرګون وښود.
نوموړي په یوه ټلویزیوني مرکه کې وويل، چې د راتلونکي سياسي نظام د څرنګوالي ټاکلو حق د څو بهرنيو هېوادونو په پلازمینو کې د مېشتو افغانانو صلاحیت نه دی.
د هغه په وينا، په دې اړه پریکړه د مسوولو نهادونو صلاحيت دی.
ستانکزي له مسوولو نهادونو څخه خپل هدف واضح نه کړ، خو په افغانستان کې د لغوه شوي جمهوري اساسي قانون او نورو قوانينو په اساس د داسې مهمو مسايلو په اړه پریکړه د افغانستان د لوېې جرګې صلاحیت دی.
ستانکزی، چې د جمهوري نظام په وروستيو کلونو کې د ملي دفاع وزارت او ملي امنيت لوی رياست سرپرست و، په وروستيو کې ېې طالبانو سره د جمهوريت د مذاکراتي پلاوي مشري کوله.
هغه مني، چې د افغانستان د سیاسي نظام په مرکزیت کې ستونزې وې او د ډېر مرکزیت او سیمه ییزو چارواکو ته د لږو صلاحیتونو د ورکړې له امله خلک ستونزو سره مخ وو.
دی له دې سره، ټینګار کوي چې د نظام د بڼې د بدلون يا نه بدلون پرېکړه باید په یوه نورمال وضعیت کې د مسوولو بنسټونو له لوري وشي.
له څه مودې راهيسې له هېواده بهر ته تللي یو شمېر پخواني چارواکي او نا پښتانه فعالان په افغانستان کې د سياسي نظام د بڼې بدلون د ستونزو د حل لارې په توګه مطرح کوي.
ځینې دغه فعالان د فېډراليزم سیاسي نظام افغانستان ته ښه سياسي چوکاټ بولي، خو دا غوښتنې له سختو مخالفتونو سره مخامخ شوي دي.
په دې اړه دا راپور لوستلی شئ:
جلال: د افغانستان فيدرالي کیدل د ملت نه، د پاکستان او ايران غوښتنه ده