تاند:( چار شنبه، د جدي ۲۱) د پاکستان مخکیني صدراعظم عمران خان، چې د صدراعظمۍ پر مهال یې طالبان بيرته پر افغانستان واکمن شول، د دغې ډلې رژيم سره د پاکستان د اوسني حکومت پر اړیکو نیوکې کړي.
نوموړي په یوه وینا کې د پاکستان د کورنیو چارو وزیر رانا ثنا الله له لوري د پاکستاني طالبانو د ځپلو په پلمه پر افغانستان د پاکستان د برید خبرداری نامسوولانه ګڼلی او ویلي، چې که د پاکستان حکومت له ترهګرۍ څخه خوندیتوب غواړي، د افغانستان حاکمې ادارې سره دې ښې اړيکې وساتي.
د پاکستان دغه سياستوال، چې د طالبانو په دفاع مشهور دی، دغه راز زياته کړې چې د پاکستان د بهرنيو چارو وزير په توګه د بلاول بوټو زرداري لومړنی سفر باید کابل ته وای.
عمران خان دغه راز د افغان طالبانو په منځګړتوب له پاکستاني طالبانو سره د خپل حکومت پر مهال د سولې خبرو او اوربند د تړون دفاع کړې او وروسته ېې د اوسني حکومت له لوري د دغه تړون په نقض نیوکې کړي.
د پاکستان حکومت د نوموړي د نیوکو په اړه څه نه دي ويلي.