راشد احمد خان د انګازې پروډکشن مشر وټاکل شو

تاند:( يکشنبه، د جدي ۱۸) ‏د پښتو مشهور سندرغاړی ډاکټر راشد احمد خان، چې تازه یې د پښتو موسیقۍ په اړه د دوکتورا سند څخه دفاع کړې، د انګازې پروډکشن مشر ټاکل شوی.

انګازه پروډکشن د عوامي نیشنل ګوند او باچا خان مرکز اړوند دی، چې پېښور کې د پښتو موسیقۍ د ودې لپاره کار کوي.

مخکې د پښتو مشهور انقلابي سندرغاړی ګلزار عالم د ياد شوي پروډکشن مشر و.

معلومه نه ده، چې ښاغلي عالم ولې یاده دنده پريښې يا ورڅخه ګوښه شوی دی.

راشد احمد خان په پېښور کې د هنرمندانو د ټولنې مشر او د ټکر هنري سټډيو مسوول دی.

هغه په افغانستان کې د طالبانو له واکمنيدو وروسته پېښور ته د ورغلو افغان هنرمندانو د پالنې او د پاکستان د پولیسو له لوري یې د مزاحمت پر ضد هم فعالیتونه کړي.

راشد احمد خان هم د معياري پښتو موسيقۍ له فعالو او مشهورو څېرو څخه ګڼل کیږي.