تاند:( دوشنبه، د قوس یوویشتمه) په کابل کې د پاکستان پر سفارت د څو اونۍ مخکې برید څخه وروسته، په کابل کې د چین سفیر د خپل سفارت د امنيت ساتلو غوښتنه کړې ده.
د طالبانو د بهرنيو چارو وزارت په یوه اعلامیه کې راغلي، چې د چین سفیر دا غوښتنه د طالبانو د بهرنيو چارو وزارت له سياسي مرستيال عباس ستانکزي سره د لیدنې پر مهال کړې ده.
سرچینه زیاتوي، چې ستانکزي چينايي سفير ته په دې اړه د پوره همکارۍ ډاډ ورکړی او ويلي، چې د ټولو سفارتونو امنیت ساتلو ته په پوره پاملرنه کيږي.
د طالبانو له واکمنيدو سره، په کابل کې د روسیې او پاکستان پر سفارتونو بريدونه شوي، چې ځينې نور هیوادونه يې هم انديښمن کړي دي.
طالبان بيا د ټولو سفارتونو د امنيت تامينولو ډاډ ورکړی او د پاکستان پر سفارت د برید د عامل نيولو اعلان يې کړی.