تاند:(دوشنبه، د قوس څوارلسمه) د طالبانو د ځینو سخت دريځو چارواکو له پارونکو څرګندونو سره هم مهاله، د دوی د دفاع وزیر ملا یعقوب مجاهد متحده عربي اماراتو ته د سفر پر مهال د افغانانو تر منځ په يووالي او یو بل زغملو ټینګار کړی.
نوموړي د ټولنې د ټولو قشرونو په همغږۍ له ټینګار سره وویل، چې افغانان په هره برخه کې کادرونه لري، خو د درملنې لپاره لا هم پاکستان ته روان دي او له مجبوریته دغه « ذلت» پر ځان مني.
نوموړي په سیاسي، اقتصادي او نظامي برخو کې د ټولو افغانانو ګډون مهم وبلل، خو په مشخص ډول ېې د ټول شموله حکومت يا نورو ورته غوښتنو د ملاتړ خبره ونه کړه.
د طالبانو د دفاع وزیر د افغانستان د ډیرو قومونو له نوم اخیستو سره د دوی په یووالي او تبعيض سره د مبارزې غوښتنه هم وکړه.
هغه په عین حال کې، د افغانستان له پولو د دفاع ډاډ ورکړ او ويې ويل، چې څوک به د افغانستان خاورې ته په بد نظر ونه لیدلای شي.
د طالبانو د دفاع وزیر په متحده عربي اماراتو کې مېشتو افغان پانګوالو ته په خطاب کې له دوی وغوښتل، څو خپلې پانګې هېواد ته انتقال او خلکو ته ېې ګټه ورسوي.
د ملا یعقوب څرګندونې د خلکو له هرکلي سره مخ شوي.
د طالبانو ځينو منتقدانو بيا ويلي، چې د هغه په ګډون د طالبانو د نوي نسل څېرې او اصلاح غوښتونکي بايد د خبرو پر ځای د عملي اقداماتو لپاره لاس په کار او د نجونو د ښوونځيو د ژر پرانيستلو په ګډون له غیر طالبانو سره د ځینو طالب مشرانو د تبعيض او نفرت خورولو مخنیوی وکړي.
هغه کسان څه طالب او غیر طالب چې قومي تعصبونو ته لمن وهې سل په سلو کې یا د پاکستان یا د ایران او یا هم د تاجکستان لاسپوسي دي. دوئ د افغانانو په تفرقې کې خپلې ګټې ویني. افغان قومونه ټول ورونه دي او یي به.